Mbwe,
Ndjambu diya, alonga mboka na betoko kota. Abaya mwado umboko
avadjayaka namu mwana dina na Djomba dja Ndjambu.
Djomba
dja Ndjambu abetyendi pwandja meni nyeve, nyeve kula, kabo malango
ndi ma betyemu modjungulani, mokwanyi ene mokambo. Ke abetyendi
vabetyemu a mu etumbe, ke adondjietye na dja winde, etondje atoyo na
wana wado waviyandi ke amuondaka nyangwe: ¡ya veletyengwe e mokobe,
bolo ngoni waviya, na mabene maya e meleka na pwandja nyaya nye
saina, ¡ya botakangwe e mokobe. Vasanyangwe, engamu abotamu e mokobe
teyi. Ngoni nyepabe, wana ndi mwave ayi've.
Nyangwe
na, mwame ayayandi, avondi na vama'viak'unyeni kete e likani beema
evara, vamaimwakamu e viyo ke adja bio. Ngoni nya wado na, ¡be, momu
ugugu na atawetye beema botawetye, ke uwe mba toyokomu, kabote lokaka
tyingoadu egombe eziepi. A nyangwe na, engate toyonimu djoba n'igugu.
Wana
wado wavate timbaka. Egombe zie na, na na.
Djobi'vokwe
ngoni nyeviya. A mwana na: ¡ya veletyengwe e mokobe, bolo ngoni
waviya. Nyangwe avelemu e mokobe. Ngoni na ndi mwave ayive, mu na
ayayandi, likakani beema evara, vamaimwakamu kete amudjaka. Ngoni
botimbaka. Ve'mwa a mwana e viyo, amudjaka bedja beziepi mba tayaka
nyangwe ima tima.
Nyangwe
namu na, ndi djele iziele, edjandi bedja'biave mba tayaka nbwe ima
tina, na wandi na ebolo aitatadjave, na tamwago djele e
bekanga'biame, ke ove imetye ngwe mbago'zimbuwetye na ngwe ndi na
tuka na eboloave. Djoba dje nga betyewa waviaka rope, na likandive
eboka, ke wapatakave manama me mayeve ene mokambo mara.
Djobi'voko
tego ngoni nyeviya. A mwana tego amuondaka nyangwe: iyao veletye ngwe
e mokobe, bolo ngoni waviya. Nyangwe diya ene moto oka. Vapabetye
ngoni etoyomemu, wana o, o, o, ¿onge nganana ndi eye ve ene mokambo?
Kabo tyingo na tyingo ndi ekana. Wamupatakamu manama, ano adulaka
eko, umbokwe ebo, umbokwe molo. Kwanga waviya patamu manama maziepi
avawaka. Wavatyetye Nyangwe avalikanaka umeni.
Na
ngwe na viaka'ro, na ngwe na timbaka.
Versión
en lengua dwone
Fuente:
Jacint Creus/Mª Antonia Brunat
0.111.1
anonimo (guinea ecuatorial) - 055
No hay comentarios:
Publicar un comentario