Totyiga, balea ku elefante .032

Baléa ku elefante y ney tudu bisjata jamá patadu waya y ney bisajan yapemetadji dajantu y ne fe tába ngwe nguengatyi.

Tadaxi pá tótyiga ku tenjata bensala xii jasamaney séhé ja sa puflá joney, fa y fó téney pi séa tá ké ja sa fáne jossay y jasáli. Tá dadjia batoja déxi kéhé tyia djia pé joney ba bé. Waya nonta saja jope taix, óxi ké fanei jóssay tótyiga na sé fa y ten fa elefante joximéf.

Ta da déxi sé fá balea bo ja gaden budjéguél po bó gaden van budjíguél jamangandji; se tá da juáthfela déxi da djá séhé nen bay, sé ne badála sé tótyiga bé sé ma jodo pé balea tójóso labu sé be se ten mawán pé elefante, sé jó lé tyinka ba ván budjíguél sé faney tudu óxi bojabé jódo teza bo ja jomessa ja té, sé ney tudu jozogópe.

Tá da goly se jonta ba tosá teix se jódo tezá sé ne jomessa ja tanja, ta kéne ja sa tanja sé jasa van budu ja baya ku janta, balea jasabéli elefante jasabél mindji angwe na jasabenguéf. Xii batoja oxi tódo jabenta jalma ja féney tudu patá patá, se balea bi sé fali jamada muya den omá bó, setensajóxi elefante ten fali; sé fali: jamada tótyiga m'bé bó óxi non já tanja bosala ja baya pobó be fó djá sa dja-dodjay n'gwe jada bó óndolo, se tensajóxi n'guixki ten fál.

Fó déx sé nen jada tótyiga óndolo bi toja dja sa dja dódjay.

32. La tortuga, la ballena y el elefante.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050