Obola no lotyorityori le nokonoko .066

Ajo je: Ja se¡ rijue la bola be batta. Be amma ba sese ebilako bio epa iberi bia bijem, tya o bosuba oboola bo lotyorityori lo looto luai; ba bo pobesi. Ebelo o ojua e le pele ba jiwuana e bijem bi lubo e nokonoko, ba te bijuaba. O bye abo e a para bokia ba lotae.

Obola bolo aboiye etata, ajes¡ jo lota; buae e le ele e noknoko a lo e la otte, a buero o tyobo, esari. O botyio bo jekibo jnna, o bola bule bue jero o lota e nokonoko. Bue bae asari. O bosuba etye o boya¡ na a ajora ore enokonoko. O boya¡ a: a banatwuoo ba ta pityo ole kole, ue ka paao penne? E sikole so lotyorityori, si sore etata, si e jeso o lota e nokonoko. E le poe, si bauteio o bosike bua bio. E kole ba jeri jo ikiro toutou; buae e solae soia. Elo ebari ai. La lo na e nokonoko ta jori ebuerabuera, e etye e solae na: na o le sor¡ matyilo, na ntyi a la poa. Ajo jnna, o le naere elako ose ba, nne osela.

Tue tyin ajo o bola bosuba o boya¡ e a bojori jetan a bololo. Balo be oeero obwutyi abo ekoe. 1 nobbe i tyuana na ba jesi ripoto jo ekera bilako; be le ke na o bola bo lotyorityori a la beka jnna, ba jeri ejeta be le pele reo bio, ba bo pinobierie e reo ata. E le ope a bope buela, elere e nokonoko. E erebae, e poi e bo boya a bope ata.

A bola bololo, be seere e bilako o Botuku Bote bio bua ripoto. Ba boi ba tubaerio o Botuku Bote na o buityabo a ba pao bukaelo ratye pua na je belepo na biatei. O Botuku a ajor a lem. Obola poi, etye nokonoko ai e buiam. Eleketto, a banatuo ba so¡ eso¡ a laba la tapao peno re ribotyo buela. Ba boro o Botuku na o buityabo a: Mpao pela e itoji buela la bwuato, laja e itoji ro arere sebam na so bori a lo e lotoo buela lue la. E bola bijio a lo a pityi la, buae a tem pepe tya e le elele e nokonoko. Ba ta baleboro ebelo a jerie oe wuato buela, ba tyi anna o wuato buela e nokonoko lo a. E tyuana o Botuku ene eribola a naesio ela.

E le jore, o bola a nkwua nka ba tapaa. A jero o Botuku alo, a: a ba natuom ba la pao penna e. Ba bijio, buae ba ta buatobierio. Ba jerio wuato buela be appeba jo jelo a itoji. Jele sa na ja ta jeri pepe, be a tyianne etye ba tyiamme.

Siatta kolo kolo ba, kolo.

66. El niño sarnoso y el monstruo.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050