Foli zanja bobo majaku .010

Dantu mematu tela nagul saku wa sapa limaya, massu, ku bahabu... Tempu tempu iney bi ja ta wa ja ma'soso, n'guixi bi jada odji sa lian n'guixi ja fatali asaje de ku jata mata, za pa n'gutukumel.

Tótyiga se bi jakendé kú jók, jantu jossay dja tudu y ja djuni tadji.

Wan pamasedu kun'gutu lanta se atoja ógué djingwe tudu tyintyi laba, tádaxi n'gutudu v'la ódatótyiga, tadaxi sé fa jayféf; sé apéxi, mindjí a janda jua passenguíxi fé josay pa póma lidabél.

Anta ja fé pa tótyíga ba djuni, séé ma wan faj'a, sé pé wan'gatyidél pa n'guixi tenje limpazaja péli ba bagal. Oxi djunimangu tudu, se majaku lant'a se jomessa ja lontógó péngwé. Ta ku óna dédé sé be ja ku totyiga ja tyabilin sé be pé ba limpa pé tótyíga, ixi kébe mosso se zanja dé jomessa ja fe sánguipata pata.

Batoja ku fidase na tan sojaf, xiké mólé motyi totyiga, tadaxí, taka bél pamassedu xi sé a de ku ja mata se a me p'san se ngutud kumél, fodexí se majaku foli zanja dé ja bóbó.

10. El culo rojo del macaco.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050